बडतर्फ पोलिसाने , पत्नीच्या मदतीने युवकाला १८ लाखांचा घातला गंडा

कमी दरात सोने देण्याच्या बहाण्याने बडतर्फ पोलिस कर्मचाऱ्याने पत्नीच्या मदतीने युवकाला १८ लाख रुपयांनी गंडा घातला. याप्रकरणी सदर पोलिसांनी दाम्पत्याविरुद्ध फसवणुकीसह विविध कलमांन्वये गुन्हा दाखल केला.

पल्लवी जावळीकर व तिचा पती कमलेश जावळीकर (रा. पोलिस क्वॉर्टर, गिट्टीखदान), अशी गुन्हा दाखल करण्यात आलेल्यांची नावे आहेत.

शुभम जगदीश नेभनानी (रा. बालाजीनगर, पटवारी कॉलनी, मूर्तीजापूर, जि. अकोला) याने दिलेल्या तकारीवरुन हा गुन्हा दाखल करण्यात आला.

पोलिसांनी दिलेल्या माहितीनुसार, शुभम हा जेसीबी भाड्याने देण्याचे काम करतो. त्याचा मित्र हिमांशू गुप्ता हा नागपुरात राहत असून तो एका कंपनीत काम करतो.

मे महिन्यात हिमांशूने शुभमच्या मोबाइलवर संपर्क साधला. त्याची मैत्रीण पल्लवी जावळीकर ही सोने खरेदी-विक्रीचे काम करते, असे त्याने सांगितले.

१५ डिसेंबरला शुभमचे लग्न असल्याने त्याने सोने खरेदीसाठी होकार दिला. ५ मे रोजी पल्लवीने शुभमच्या व्हॉट्सअॅप क्रमांकावर संपर्क साधला.

‘सोने खरेदी करावयाचे असल्यास नागपूरला येऊन भेटा’, असे ती त्यांना म्हणाली. ७ मे रोजी शुभम हा पल्लवीला सदरमधील हल्दीराम हॉटेलमध्ये भेटला.

‘बाजारभावापेक्षा १० हजार रुपये कमी दराने सोने मिळवून देते’, असे आमिष तिने शुभमला दिले. शुभमने तिला ६० हजार रुपये दिले. त्यानंतर एका तासाने पल्लवीने त्याला पाच ग्रॅमचे सोन्याचे बिस्कीट आणून देत

त्याचा विश्वास संपादन केला. अधिक सोने खरेदी केल्यास ५० हजार रुपये प्रतितोळा दराने सोने उपलब्ध करून देण्याचे आश्वासन तिने शुभमला दिले.

काही दिवसांनी शुभम पुन्हा नागपुरात आला. त्याने पल्लवीला १८ लाख रुपये दिले. ‘तासाभरात सोने आणून देते’ असे सांगून

पल्लवी एमएच ०१ एएच ४२०५ क्रमांकाच्या कारने सदरमधील हॉटेलमधून निघून गेली. मात्र, तासाभरानंतरही ती परतली नाही. शुभमने तिच्या मोबाइलवर संपर्क साधला असता ‘उद्या सोने आणून देते’ असे ती म्हणाली.

दुसऱ्या दिवशी रहाटे कॉलनी चौकात पल्लवी त्याला भेटली. तिने २५७ ग्रॅम सोने शुभमला दिले. हे सोने घेऊन शुभम गावी गेला. सराफाकडे तपासणी केली असता ते नकली असल्याचे समोर आले.

याबाबत शुभमने तिला विचारणा केली असता, ‘मी ज्या सोनाराकडून सोने घेते, त्याला पोलिसांनी अटक केली आहे. काही दिवस थांब’ असे ती म्हणाली.

काही दिवसांनी शुभम हा नागपुरात आला. पल्लवीला भेटला. पल्लवी त्याला शुक्रवारी परिसरात घेऊन गेली. ‘सोनाराला भेटून येते’, असे सांगून ती शुभमला कारमध्ये बसवून निघून गेली ती परत आलीच नाही.

काही वेळाने पल्लवीचा पती कमलेश हा साथीदारासह तेथे आला. त्याने शुभमला कारमधून उतरविले व कार घेऊन पसार झाला. फसवणूक झाल्याने शुभमने सदर पोलिसांत तक्रार दिली. पोलिसांनी गुन्हा दाखल करून तपास सुरू केला आहे.

कमलेश हा फसवणूक करण्यात कुख्यात आहे. २०१९मध्ये वाडी पोलिस ठाण्यात तैनात असताना कमलेशने सराफा व्यापारी सुरेंद्र फत्तेचंद कोठारी (वय ३९, रा. ताजश्री लक्ष्मण अपार्टमेंट, टिम्बर भवनजवळ)

यांची प्लॉट देण्याच्या बहाण्याने १३ लाख १७ हजार रुपयांनी फसवणूक केली होती. दरम्यान, सतत गैरहजर राहात असल्याने मार्च महिन्यात त्याला पोलिस सेवेतून बडतर्फ करण्यात आले.