भाजपच्या महाराष्ट्रातील पहिल्या यादीत जातीय समतोल राखण्याचा प्रयत्न
Attempt to maintain caste balance in BJP's first list in Maharashtra
भाजपने महाराष्ट्रातील २० लोकसभा मतदारसंघांमधील उमेदवारांची घोषणा केली आहे. यामध्ये तब्बल नऊ मराठा समाजातील उमेदवारांचा समावेश आहे.
याशिवाय पाच ओबीसी समाजातील उमेदवार आहेत. नागपुरातून ब्राह्मण उमेदवाराला संधी देण्यात आली आहे. तर मुंबईतील दोन्ही उमेदवार गुजराती आहेत.
याशिवाय दोन अनुसूचित जमाती, तर एका अनुसूचित जातींसाठी राखीव मतदारसंघातील उमेदवारांचा यादीत समावेश आहे. महाराष्ट्रातील पहिल्या यादीत जातीय समतोल राखण्याचा पुरेपूर प्रयत्न भाजपने केल्याचे दिसत आहे.
मराठा आरक्षणाच्या मागणीसाठी जालन्यातील आंतरवाली सराटीत मनोज जरांगे पाटील यांनी केलेल्या दीर्घकालीन आंदोलनाने सरकार बॅकफूटवर गेले.
या आंदोलनाचे पडसाद राज्याच्या कानाकोपऱ्यात उमटले होते. सरकारची प्रतिमा मराठा-विरोधी अशी होण्याची भीती निर्माण होत असल्याने भाजपने मराठा कार्ड खेळल्याचे बोलले जात आहे.
नऊ मराठा उमेदवारांपैकी सात विद्यमान खासदारांनाच पुन्हा संधी मिळाली आहे. तर उर्वरित दोघांमध्ये अकोल्यातील आजारी विद्यमान खासदार संजय धोत्रे यांचे सुपुत्र अनुप धोत्रेंचा समावेश आहे.
याशिवाय, पुण्यातून मुरलीधर मोहोळ यांना संधी देण्यात आली आहे. पुण्याचे नेतृत्व ब्राह्मण समाजातील असलेले गिरीश बापट करत होते, परंतु त्यांच्या निधनानंतर आता मराठा उमेदवाराची वर्णी लागली आहे.
नुकतीच राज्यसभेवर मेधा कुलकर्णी यांची नियुक्ती करण्यात आली आहे. त्यामुळे भाजप नेतृत्वाने आणखी एक ब्राह्मण चेहरा देण्याचे टाळले असावे.
याशिवाय ओबीसी समतोल राखण्यासाठी पाच ठिकाणी इतर मागासवर्गीय समाजातील उमेदवार देण्यात आले आहेत. यात तीन नवीन चेहरे आहेत.
पहिले म्हणजे सुधीर मुनगंटीवार, दुसऱ्या उन्मेष पाटील यांच्या जागी तिकीट मिळालेल्या स्मिता वाघ. इथे ओबीसी फॅक्टर कायम असला तरी चेहरा बदलण्यात आला.
तर तिसऱ्या पंकजा मुंडे. त्यांच्याबाबतीतही भगिनी प्रीतम मुंडे यांना बदलून तिकीट मिळाल्याने फॅक्टर कायम राहतो. याशिवाय रक्षा खडसे आणि कपिल पाटील यांना रिपीट करण्यात आलं आहे.
नंदुरबारमधून हीना गावित आणि दिंडोरीतून भारती पवार या अनुसूचित जमातींसाठी (एसटी) राखीव मतदारसंघातील विद्यमान खासदारांनाच पुन्हा संधी मिळाली आहे.
तर लातूरमधून सुधाकर श्रुंगारे यांनाही अनुसूचित जातींसाठी (एससी) राखीव मतदारसंघात पुन्हा तिकीट मिळालंय. पहिल्या यादीत नितीन गडकरी हे एकमेव ब्राह्मण चेहरा आहेत.
तर उत्तर मुंबईतून पियुष गोयल आणि उत्तर पूर्व (ईशान्य) मुंबईतून मिहिर कोटेचा असे दोन्ही गुजराती उमेदवार भाजपने मैदानात उतरवले आहेत.
जातीनिहाय उमेदवारी
मराठा उमेदवार
धुळे – सुभाष भामरे
अकोला – अनुप धोत्रे
वर्धा – रामदास तडस
नांदेड – प्रताप पाटील चिखलीकर
जालना – रावसाहेब दानवे
पुणे – मुरलीधर मोहोळ
माढा – रणजीत नाईक निंबाळकर
सांगली – संजयकाका पाटील
अहमदनगर – सुजय विखे
पुण्यातून; मुरलीधर मोहोळ
ओबीसी
चंद्रपूर – सुधीर मुनगंटीवार
जळगाव – स्मिता वाघ
रावेर – रक्षा खडसे
भिवंडी – कपिल पाटील
बीड – पंकजा मुंडे
अनुसूचित जमाती (एसटी) (राखीव मतदारसंघ)
नंदुरबार – हीना गावित
दिंडोरी – भारती पवार
