खळबळजनक घटना;धावत्या रेल्वेतून तिघांना फेकले

मुंबई लोकमान्य टिळक टर्मिनसहून रकसोल बिहारकडे जाणाऱ्या कर्मभूमी एक्सप्रेसमधून नाशिक रोड रेल्वे स्थानकाजवळ असलेल्या भागात तिघे युवकखाली पडल्याची भीषण दुर्घटना शनिवारी रात्री घडली.

या अपघातात दोन युवकांचा जागीच मृत्यू झाला असून एक जण गंभीर जखमी आहे. जखमी युवकावर जिल्हा रुग्णालयात उपचार सुरू आहेत.

ओढा रेल्वे स्थानकावरील स्टेशन प्रबंधक आकाश यांनी नाशिक रोड रेल्वे विभागाशी संपर्क साधून कळवले की, गाडी सुटल्यानंतर काही वेळात जेल रोड हनुमान मंदिरजवळील ढिकले नगर परिसरात तिघे युवक रेल्वेखाली पडले आहेत.

घटनेची माहिती मिळताच नाशिक रोड पोलिस ठाण्याचे वरिष्ठ पोलिस निरीक्षक जितेंद्र सपकाळे यांच्या मार्गदर्शनाखाली पोलीस उपनिरीक्षक माळी,

पोलिस हवालदार भोळे व पथकाने घटनास्थळी धाव घेतली. भुसावळकडे जाणाऱ्या पटरीवरील किलोमीटर 190/1 ते 190/3 दरम्यान 30 ते 35 वयोगटातील दोन युवक मृतावस्थेत आढळले. तर एक युवक गंभीर जखमी अवस्थेत मिळून आला.

गंभीर असलेल्या युवकास तातडीने रुग्णवाहिकेतून जिल्हा सरकारी रुग्णालयात दाखल करण्यात आले. प्रवाशांची ओळख अद्याप पटलेली नाही. दिवाळीच्या पार्श्वभूमीवर उत्तर भारतात जाणाऱ्या रेल्वेमध्ये प्रचंड गर्दी असते.

त्यामुळे गाडीतून पडून हा अपघात घडल्याची प्राथमिक माहिती समोर येत आहे. हे युवक सणासाठी गावी जात होते की, बिहार निवडणुकीसाठी मतदानासाठी जात होते, याबाबतही तपास सुरू आहे.

कर्मभूमी एक्सप्रेसमध्ये प्रवाशांची मोठी गर्दी होती. यादरम्यान दरवाज्याजवळ असल्याने हे युवक गाडीतून पडल्याचा एक अंदाज आहे.

जखमी युवकावर नाशिक जिल्हा रुग्णालयात उपचार सुरू असून त्याची तब्येत स्थिर असल्याची माहिती मिळत आहे. या युवकांची मदत पटवण्याचे काम सध्या सुरू आहे. या घटनेने मोठी खळबळ उडाली असून पोलिस या प्रकरणात शोध घेत आहेत.