शिंदे सेनेच्या नेत्यांवरील केस बंद;पोलीस म्हणतात गैरसमजातून गुन्हा नोंदवला
Case against Shinde Sena leaders closed; Police say case registered due to misunderstanding
मुख्यमंत्री एकनाथ शिंदे यांच्या नेतृत्वातील शिवसेनेचे नेते आणि उत्तर पश्चिम मुंबई लोकसभा मतदारसंघाचे खासदार रवींद्र वायकर यांना मोठा दिलासा मिळाला आहे.
जोगेश्वरी येथील मातोश्री क्लबचे कथित भूखंड घोटाळा प्रकरण बंद करण्याबाबतचा अहवाल कोर्टाने स्वीकारला आहे. त्यामुळे ऐन विधानसभा निवडणुकीच्या तोंडावर
वायकर दाम्पत्याला मोठा दिलासा मिळाला आहे. विशेष म्हणजे गैरसमजातून गुन्हा दाखल झाल्याचं अहवालात नमूद करण्यात आलं आहे.
माजी मंत्री रवींद्र वायकर, त्यांच्या पत्नी आणि आता विधानसभेच्या उमेदवार असलेल्या मनिषा वायकर यांच्यासह काही साथीदारांवर जोगेश्वरी येथील कथित भूखंड घोटाळा प्रकरणात गुन्हा दाखल करण्यात आला होता.
परंतु मुंबई महापालिकेने रवींद्र वायकर यांच्या विरोधात गैरसमजातून गुन्हा दाखल केल्याचं नुकत्याच सादर केलेल्या अहवालात नमूद करण्यात आलं आहे.
आर्थिक गुन्हे शाखेने हे प्रकरण बंद करण्याची मागणी करणारा अहवाल कोर्टात दाखल केला. आता हा अहवाल गिरगाव महानगर दंडाधिकारी न्यायालयाने स्वीकारला आहे.
जोगेश्वरी येथील भूखंडाचा गैरवापर करुन त्याजागी हॉटेल बांधण्याचा रवींद्र वायकर यांचा इरादा असल्याची माहिती मुंबई महापालिकेपासून लपवल्याचा आरोप करण्यात आला होता.
दरम्यानच्या काळात रवींद्र वायकर यांनी उद्धव ठाकरे यांच्या शिवसेनेची साथ सोडून एकनाथ शिंदे यांच्या शिवसेनेत प्रवेश केला. लोकसभा निवडणुकीत त्यांनी उत्तर पश्चिम मुंबई मतदारसंघातून निवडणूक लढवली.
सुरुवातीला वायकरांचा एका मताने पराभव झाल्याचं वृत्त समोर आलं. मात्र फेरमतमोजणीत ४८ मतांसह त्यांनी ठाकरे गटाचे उमेदवार अमोल कीर्तिकर यांचा पराभव करुन निसटता विजय मिळवला.
आता वायकरांना क्लीन चिट देत मुंबई पोलिसांच्या आर्थिक गुन्हे शाखेने केवळ गैरसमजातून हा गुन्हा नोंदवल्याचा अहवाल कोर्टात सादर केला. रवींद्र वायकर यांच्या विरोधातील तपास बंद झाल्याने त्यांना मोठा दिलासा मिळाला आहे.
त्यांच्या पत्नीसह अन्य भागीदारांच्या विरोधात गुन्हा नोंदवण्याची मागणी पालिकेने केली होती. मात्र अभियंत्याच्या माध्यमातून केलेली ही तक्रार चुकीच्या माहितीच्या आधारे नोंदवल्याचं आता अहवालात म्हटलं आहे.
