महायुतीतही शिंदे यांचा अमित शहा यांना मला मुख्यमंत्रिपदाचा चेहरा जाहीर करण्याची मागणी

शिवसेनेत इतिहासातील सगळ्यात मोठी फूट पडून एकनाथ शिंदे कोणाच्या ध्यानीमनी नसताना मुख्यमंत्री झाले. आता विधानसभा निवडणूक तोंडावर आली आहे.

निवडणुकीत महायुतीच्या बाजूनं मतदारांनी कौल दिल्यास मुख्यमंत्रिपदी कायम राहण्यासाठी एकनाथ शिंदेंनी फिल्डींग लावण्यास सुरुवात केली आहे.

केंद्रीय गृहमंत्री यांनी नुकतीच एक बैठक बोलावली होती. नक्षलवादाच्या संकटावर चर्चा करण्यासाठी आयोजित करण्यात आलेल्या बैठकीनंतर शिंदेंनी शहांकडे मुख्यमंत्रिपदी कायम राहण्याची इच्छा व्यक्त केली.

राज्यातील सुरक्षा आणि नक्षलवादाची समस्या यासाठी आयोजित करण्यात आलेल्या बैठकीला मुख्यमंत्री शिंदे उपस्थित होते. विशेष म्हणजे गृहमंत्रिपद सांभाळणारे देवेंद्र फडणवीस या बैठकीला गैरहजर होते.

सुरक्षेच्या प्रश्नांवर आयोजित बैठक संपल्यावर शिंदेंनी शहांसोबत जागावाटपाबद्दल चर्चा केली. त्यांनी शहांकडे १२० जागांची यादी दिली.

महायुतीला पुन्हा सत्तेत आणायचं असेल तर शिवसेनेला अधिकाधिक जागा द्या, अशी मागणी शिंदेंनी शहांकडे केल्याचं वृत्त द न्यू इंडियन एक्प्रेसनं सुत्रांच्या हवाल्यानं दिलं आहे.

भाजपच्या आमदारांची संख्या शिंदेंच्या आमदारांच्या अडीचपट आहे. त्यामुळे जागावाटप भाजप मोठा भाऊ असणार आहे. पण सेनेला अधिकाधिक जागा मिळाव्यात यासाठी शिंदे आग्रही आहेत.

तशी भूमिका त्यांनी शहांकडे मांडली. ‘राज्यात भाजपविरोधात वातावरण आहे. लोकसभा निवडणुकीप्रमाणे भाजप विधानसभेला अधिक जागांवर लढल्यास भाजपचा आकडा खूप खाली येईल.

त्यामुळे भाजप अधिक जागा न लढवता त्या शिवसेनेला द्याव्यात. लोकसभेत शिवसेनेची कामगिरी भाजप आणि अजित पवारांच्या राष्ट्रवादी काँग्रेसपेक्षा चांगली राहिली आहे,’ असं शिंदेंनी शहांना सांगितल्याची माहिती सुत्रांनी दिली.

महायुतीनं मुख्यमंत्रिपदाचा चेहरा म्हणून आपलीच घोषणा करावी, अशी मागणीदेखील शिंदेंनी शहांकडे केली. ‘महायुतीनं आपल्याला मुख्यमंत्रिपदाचा चेहरा घोषित केल्यास महायुतीच्या सगळ्या उमेदवारांमागे आपण पाठबळ

आणि सगळी संसाधनं उभी करु, अशी ऑफर शिंदेंनी दिली,’ अशी माहिती खात्रीलायक सुत्रांनी दिली आहे. याबद्दल भाजप नेतृत्त्वानं शिंदेंना कोणताही शब्द दिलेला नाही.

मुख्यमंत्रिपदाचा चेहरा घोषित केल्यास सगळी संसाधनं महायुतीच्या उमेदवारांमागे उभी करण्याची ऑफर शिंदेंनी शहांना दिलेली आहे. विशेष म्हणजे ठाकरे गटाचे खासदार संजय राऊत यांनी

काल शिंदेंवर खोक्यांवरुन निशाणा साधला होता. राज्यात देवेंद्र फडणवीसांना कोणी विचारत नाही. मुख्यमंत्री दिल्लीला सर्वाधिक खोके पोहोचवत असल्याचा आरोप राऊत यांनी केला होता.