लोकसभेनंतर विधानसभा निवडणुकीत शिंदेचा विदर्भातील जगावर दावा

• 

 

 

 

 

 

लोकसभा निवडणुकीत भाजपपेक्षा अधिक स्ट्राईक रेट राखणाऱ्या शिंदेसेनेनं आता विधानसभेसाठी कंबर कसली आहे. लोकसभा निवडणुकीत सर्व्हेच्या नावाखाली आमच्या अनेक जागांवर दावे सांगण्यात आले,

 

 

जागावाटपास उशीर करण्यात आला, उमेदवार बदलण्यात आले, असं म्हणत शिंदेसेनेच्या नेत्यांनी तक्रारीचा सूर आळवला. त्यातच राज्यात भाजपला केवळ ९ जागा जिंकता आल्यानं मुख्यमंत्री एकनाथ शिंदेंची पॉवर वाढली आहे.

 

 

 

मुख्यमंत्री शिंदे काल विदर्भात होते. भंडाऱ्यात त्यांनी ५५० कोटी रुपयांच्या विकासकामांचा श्रीगणेशा केला. भंडाऱ्यातील अपक्ष आमदार नरेंद्र भोंडेकर यांनी शिंदेंच्या उपस्थितीत शिवसेनेत प्रवेश केला.

 

 

 

यानंतर आता शिंदेसेनेनं विदर्भात १२ जागा लढवण्याची तयारी सुरु केली आहे. जागावाटपात शिंदेसेना डझनभर जागांसाठी आग्रही असेल.

 

 

 

विदर्भात विधानसभेच्या एकूण ६२ जागा आहेत. गेल्या काही वर्षांपासून विदर्भात भाजपला चांगलं यश मिळालं आहे. उपमुख्यमंत्री देवेंद्र फडणवीस, प्रदेशाध्यक्ष चंद्रशेखर बावनकुळे, वनमंत्री सुधीर मुनगंटीवार असे भाजपचे प्रमुख नेते विदर्भातून येतात.

 

 

 

लोकसभा निवडणुकीत भाजपला विदर्भात फटका बसला. काँग्रेसनं विदर्भात मुसंडी मारली. भाजपला केवळ दोन जागा मिळाल्या. त्यानंतर आता शिंदेसेनेनं विदर्भावर लक्ष केंद्रित केलं आहे.

 

 

 

 

भोंडेकरांच्या पक्षप्रवेशाकडे त्याच दृष्टिकोनातून पाहिलं जात आहे. ‘२०१९ मध्ये निवडून आल्यापासून ते शिवसेनेचं काम करत आहेत.

 

 

 

ते आमचे संपर्क प्रमुख होते. आता त्यांनी बाळासाहेबांच्या विचारांवर चालणाऱ्या शिवसेनेत प्रवेश केला आहे,’ असे कौतुकौद्गार शिंदेंनी काढले.

 

 

शिंदेसेना विदर्भातील १२ जागांवर दावा सांगणार असल्याच्या वृत्ताला पक्षाचे प्रवक्ते राजू वाघमारेंनी दुजोरा दिला. शिंदेंची लोकप्रियता राज्यभर आहे.

 

 

 

मुख्यमंत्र्यांची झलक पाहण्यासाठी लोक गर्दी करत आहेत, असं वाघमारे म्हणाले. नागपूर ग्रामीणमधील रामटेक आणि उमरेडच्या जागांवर सेनेचा दावा आहे.

 

 

 

शिंदेंचे निकटवर्तीय असणारे आशिष जयस्वाल २०१९ मध्ये रामटेकमधून अपक्ष निवडून आले. तर उमरेडमधून काँग्रेसच्या तिकिटावर विजयी झालेल्या राजू पारवेंनी लोकसभेपूर्वी शिवसेनेत प्रवेश केला.

 

 

 

त्यांनी आमदारकीचा राजीनामा देत रामटेकमधून निवडणूक लढवली. पण ते पराभूत झाले. या दोन्ही जागा जिंकण्याचा विश्वास वाघमारेंना आहे.

 

 

 

यासोबतच भंडारा, यवतमाळ, बुलढाण्यात शिंदेसेनेचे आमदार आहेत. तर काही अपक्ष आमदार शिंदेंचे निकटवर्तीय आहेत. शिंदेसेनेच्या १२ जागांच्या दाव्यावर भाष्य करण्यास भाजप नेत्यांनी नकार दिला.

 

 

 

विदर्भात शिवसेनेचा विजय भाजपच्या पाठिंब्यामुळे शक्य झाल्याचा भाजपच्या कार्यकर्त्यांचा दावा आहे. त्यामुळे शिवसेनेनं २० टक्के जागांवर दावा सांगणं तर्कसंगत नसल्याचा सूर भाजपमध्ये आहे.