भाजपाच्या जाहीरनामा प्रसिद्ध ;पाहा कोना-कोणाला काय देणार ?

महाराष्ट्र विधानसभेची निवडणूक अगदी तोंडावर येऊन ठेपली आहे. पुढच्या दहा दिवसात राज्य निवडणुकीला सामोरं जाणार आहे. दरम्यान भाजपाने त्यांचा जाहीरनामा प्रकाशित केला आहे.

लाडक्या बहिणींना १५०० ऐवजी २१०० रुपये देणार असं यात जाहीर करण्यात आलं आहे. तसंच इतरही घोषणा करण्यात आल्या आहेत. केंद्रीय गृहमंत्री अमित शाह, उपमुख्यमंंत्री देवेंद्र फडणवीस, खासदार पियुष गोयल तसंच चंद्रशेखर बावनकुळे यांचीही यावेळी उपस्थिती होती.

भाजपाच्या जाहीरनाम्यात कुठल्या घोषणा?
लाडक्या बहिणींना प्रत्येक महिन्याला रु. १५०० वरुन रु. २१०० देण्यात येतील तसेच या योजनेचे औचित्य साधून महिलांमध्ये आर्थिक साक्षरता निर्माण करण्यासाठी प्रशिक्षण दिले जाईल. महिला सुरक्षेसाठी २५००० महिलांचा पोलिस दलात समावेश करण्यात येईल.

शेतकऱ्यांना कर्जमाफी आणि शेतकरी सन्मान योजनेतून वर्षाला रु. १२,००० वरून रु. १५,०००, तसेच एमएसपीशी समन्वय साधत २० टक्क्यांपर्यंत भावांतर योजना राबविण्यात येईल.

प्रत्येक गरिबाला अन्न आणि निवारा देण्यात येईल.

वृद्ध पेंशन धारकांना महिन्याला रु. १५०० वरुन रु. २१०० देण्यात येतील जेणेकरून संपूर्ण महाराष्ट्रात ज्येष्ठ नागरिकांना अधिक आर्थिक सुरक्षा आणि सन्मान मिळेल.

महाराष्ट्रातील सर्व कुटुंबांना बाजारातील उतार-चढावांपासून सुरक्षित करण्यासाठी राज्यात जीवनावश्यक वस्तूंच्या किंमती स्थिर ठेवण्यात येतील.

येणाऱ्या काळात २५ लाख रोजगार निर्मिती तसेच महिन्याला १० लाख विद्यार्थ्यांना रु. १०,००० विद्यावेतन देण्यात येईल.

जाहीरनाम्यातील ठळक मुद्दे काय आहेत?
10 राज्यातील ग्रामीण भागात ४५,००० गावांत पांधण रस्ते बांधण्यात येतील.

अंगणवाडी आणि आशा सेविकांची आर्थिक सुरक्षा आणि कल्याण सुनिश्चित करण्यासाठी महिन्याला रु१५,००० वेतन आणि विमा संरक्षण देण्यात येईल.

वीज बिलात ३०% कपात करुन सौर आणि अक्षय ऊर्जेवर भर देण्यात येईल.

सरकार स्थापनेनंतर १०० दिवसांच्या आत’ व्हिजन महाराष्ट्र @ २०२९ सादर करण्यात येईल.

विज्ञान तंत्रज्ञानाच्या क्षेत्रात महाराष्ट्राला पहिल्या क्रमांकावर ठेवण्याचं आमचं धोरण आहे. फिनटेक आणि एआयचं हब म्हणून महाराष्ट्र झालेला दिसेल. या दोन्हीचं सर्वात मोठं केंद्र महाराष्ट्र असेल.

तसंच या क्षेत्रात नोकरीच्याही अनेक संधी आहेत, असंही देवेंद्र फडणवीस यांनी म्हटलंआहे. २०२७ पर्यंत ५० लाख लखपती दीदी तयार करण्याचा आमचा संकल्प आहे. असं देवेंद्र फडणवीस यांनी सांगितलं.