मुख्यमंत्री पुत्राच्या मतदारसंघात मतदानात ४ टक्क्यांची वाढ ‘कल्याण’ भाजपची चिंता वाढवणार?

• 

 

 

 

 

 

मुख्यमंत्री एकनाथ शिंदे यांचे पुत्र श्रीकांत शिंदे कल्याणमधून खासदारकीची हॅट्ट्र्रिक करण्याच्या प्रयत्नात आहे. कल्याणमध्ये गेल्या लोकसभा निवडणुकीच्या तुलनेत मतदानात वाढ झाली आहे.

 

 

 

यंदा मतदानात ४ टक्क्यांची वाढ झाली आहे. मतदानाची वाढलेली टक्केवारी कोणाच्या पथ्थ्यावर पडणार याकडे सगळ्यांचं लक्ष लागलं आहे. दोन टर्मचे खासदार असलेल्या श्रीकांत शिंदे यांच्यापुढे ठाकरेसेनेच्या वैशाली दरेकर यांचं आव्हान आहे.

 

 

 

मुख्यमंत्री एकनाथ शिंदेंनी त्यांचे पुत्र श्रीकांत शिंदेंचा उमेदवारी अर्ज दाखल करताना ‘अब की बार पाच लाख पार’ची घोषणा दिली. तेव्हापासून शिंदेंचा प्रचार मताधिक्क्याच्या भोवतीच फिरत राहिला.

 

 

 

त्यांनी २ मे रोजी उमेदवारी अर्ज भरला. यानंतर प्रचाराची दिशा बदलली. मतदानाच्या दिवशी सकाळची वेळ वगळता कल्याण पूर्व, मुंब्रा, कळवा विधानसभा मतदारसंघांमध्ये मतदानानं वेग घेतला.

 

 

 

 

महायुतीचा बालेकिल्ला असलेल्या डोंबिवली, कल्याण ग्रामीण, उल्हासनगर मतदारसंघांच्या तुलनेत मुंब्रा-कळवा परिसरात झालेलं मतदान महायुतीला चिंतेत टाकणारं आहे.

 

 

 

 

 

डोंबिवली, कल्याण मतदारसंघांमधील हजारो मतदारांची नावं यादीत नसल्यानं त्यांना मतदान करताच आलं नाही. त्यामुळे महायुतीच्या नेत्यांची धाकधूक वाढली आहे.

 

 

 

कल्याण पूर्व, मुंब्रा आणि कळवा, उल्हासनगरातील काही भागांत वैशाली दरेकरांनी जोरदार प्रचार केला. तिथून त्यांना अधिक मतदानाची अपेक्षा आहे. तिथे अधिक मतदान झाल्यामुळे दरेकरांच्या अपेक्षा उंचावल्या आहेत.

 

 

कळवा मुंब्रामधून २ लाख १६ हजार १५९, कल्याण ग्रामीणमधून २ लाख ३१ हजार १६२, कल्याण पूर्वमधून १ लाख ५६ हजार २३५ मतदारांनी त्यांचा हक्क बजावला.

 

 

 

तर डोंबिवलीत १ लाख ४२ हजार १४२, उल्हासनगरात २ लाख ३१ हजार ५०५, अंबरनाथमध्ये १ लाख ६६ हजार ४०७ मतदान झालं आहे.

 

 

 

 

लोकसभा निवडणुकीच्या तोंडावर कल्याण पूर्वचे आमदार गणपत गायकवाड यांनी शिवसेना शहरप्रमुख महेश गायकवाड यांच्यावर पोलीस ठाण्यातच गोळीबार केला होता.

 

 

 

 

 

त्याचे पडसाद राजकारणात उमटले. भाजप, सेनेतील दुरावा वाढला. त्याचं प्रतिबिंब मतदानात उमटणार का याकडे सगळ्यांचं लक्ष लागलं आहे. गोळीबार प्रकरणानंतर भाजपनं शिंदे पितापुत्रांविरोधात भूमिका घेतली. त्यांचे फोटो बॅनरवरुन हटवले होते.

 

 

 

श्रीकांत शिंदेंना ५ लाख मतांनी विजयी करण्याचा निर्धार त्यांचे वडील एकनाथ शिंदेंनी केला. हा निर्धार त्यांनी जाहीरपणे बोलून दाखवला. श्रीकांत शिंदे ५ लाख मतांनी विजयी झाल्यास त्यांचं राजकीय वजन आणखी वाढेल.

 

 

 

त्याचे परिणाम भविष्यात भाजपला सहन करावे लागतील. शिंदे यांची कल्याणवरील पकड आणखी घट्ट होईल. ते आगामी राजकारणात

 

 

भाजपला जड जाईल, याची कल्पना पक्षाच्या नेत्यांना आहे. त्यामुळे शिंदेंना खरंच ५ लाखांचं मताधिक्क्य मिळणार का याबद्दल चर्चा सुरु आहे.