विमानात बॉम्ब असल्याची धमकी; नागपुरात इमर्जन्सी लँडिंग

इंडिगो एअरलाइन्सचे फ्लाइट क्रमांक ६ ई- ७३०८ या जबलपूर – हैदराबाद विमानाच्या शौचालयात ‘ब्लास्ट अॅट ९ एएम’ असे लिहीलेला कागद आढळल्यामुळे एकच खळबळ उडाली.

या लिहिलेल्या मेसेजनंतर या विमानाचे येथील डॉ. बाबासाहेब आंबेडकर आंतरराष्ट्रीय विमानतळावर रविवारी इमर्जन्सी लॅण्डिंग करण्यात आले. या घटनेने चांगलीच खळबळ उडाली असून तास विमानतळावर तणावाचे वातावरण आहे.

इंडिगोचे जबलपूर – हैदराबाद हे विमान नियोजित वेळापत्रकानुसार, सकाळी ७.५५ वाजता जबलपूर येथून उडाले. हे विमान हैदराबाद येथे सकाळी ९.५५ वाजता पोहचणे अपेक्षित होते.

दरम्यान, सकाळी ९ वाजतादरम्यान कॅबिन क्रु मेंबर ज्योतिस्मिता सैकिया यांना विमानाच्या शौचालयातील कागदी रोलच्या तुकड्यावर ‘ब्लास्ट अॅट ९ एएम’ असे इंग्लिशमध्ये लिहीलेले आढळले. त्यांनी ही माहिती वैमानिकांना दिली.

विमानात बॉम्ब ब्लास्ट होण्याच्या मेसेजनंतर मोठे तणावाचे वातावरण निर्माण झाले. कॅबिन क्रु मेंबर यांनी अशाप्रकारचा मेसेज लिहिल्याची माहिती दिल्यानंतर त्यानुसार, पुढील प्रक्रिया करत सुरक्षा यंत्रणांना कळवण्यात आले.

तसेच नागपूर विमानतळाचे संचालन करणाऱ्या मिहान इंडिया लिमिटेडशी संपर्क साधण्यात आला. त्यानंतर सकाळी ९.२१ वाजता या विमानाचे नागपूर विमानतळावर इमर्जन्सी लॅण्डिंग झाले.

विमान उतरताच बीडीडीएस, सीआयएसएफ आणि डॉग स्क्वॉडने विमानाची तपासणीला सुरुवात केली. तसेच या प्रकरणी सोनेगाव पोलीस स्टेशन येथे एफआयआर दाखल करण्यात आली आहे.

या घटनेला इंडिगो एअरलाइन्सनेदेखील दुजोरा दिला आहे. प्राप्त माहितीनुसार, सध्या सुरक्षा यंत्रणांद्वारे विमानाची तपासणी सुरू आहे.

विमान उडण्यास कुठलाही धोका नसल्याचे सुरक्षा यंत्रणांद्वारे कळवण्यात आलं. सध्या सर्व प्रवासी नागपूर विमानतळावर सुरक्षित आहेत.

इंडिगोनेही एक प्रसिद्धीपत्रक जारी करून सांगितले की, धमकीचा संदेश मिळाल्यानंतर विमान नागपूर विमानतळावर उतरवण्यात आले. सर्व प्रवाशांना विमानातून बाहेर काढण्यात आले

आणि विमानात ठेवलेल्या सामानाची तपासणी करण्यात आली. तासाभराच्या विलंबानंतर विमानाने पुन्हा हैदराबादसाठी उड्डाण केले. त्याचबरोबर धमकी देणाऱ्या अज्ञात व्यक्तीविरुद्ध विमानतळ प्रशासनाने सोनेगाव पोलिसात गुन्हा दाखल केला आहे.