धनंजय मुंडेंची अजितदादांनी केली मोठ्या पदावर नियुक्ती

महाराष्ट्राचे माजी मुख्यमंत्री अशोक चव्हाण यांनी काँग्रेसचा हात सोडून भाजपमध्ये प्रवेश केल्यानंतर राज्यातील राजकीय घडामोडींना वेग आला आहे.

आगामी लोकसभा-विधानसभा निवडणुकांमध्ये कोणती समीकरणं एकत्र येताना पाहायला मिळणार, काय उलथापालथ होणार, याकडे राजकीय वर्तुळासह सर्वसामान्याचं लक्ष लागून राहिलं आहे.

राष्ट्रवादी पक्षाचा ताबा आणि अधिकृत निवडणूक चिन्ह मिळाल्यानंतर अजित पवार यांनी मोठी रणनीती आखायला सुरुवात केली आहे. माजी मंत्री धनंजय मुंडे यांच्यावर अजितदादांनी मोठी जबाबदारी सोपवली आहे.

माजी मंत्री धनंजय मुंडे यांची राष्ट्रवादी काँग्रेस पक्षाचे प्रचार प्रमुख म्हणून नियुक्ती करण्यात आली आहे. आगामी लोकसभा निवडणुकीच्या पार्श्वभूमीवर धनंजय मुंडे यांच्याकडे महत्त्वाची धुरा देण्यात आली आहे.

“आगामी होणाऱ्या लोकसभा निवडणूक २०२४ साठी आपल्या पक्षाचे राष्ट्रीय अध्यक्ष अजितदादा पवार यांच्या मान्यतेने तसेच राष्ट्रीय कार्याध्यक्ष खासदार प्रफुल पटेल

व पक्षातील ज्येष्ठ नेते यांच्याशी विचार विनिमय करून राष्ट्रवादी काँग्रेस पार्टीचे प्रचार प्रमुख म्हणून आपली नियुक्ती करण्यात येत आहे.

आपल्या पक्षाचे व महायुतीचे जास्तीत जास्त लोकसभा सदस्य निवडून आणण्याचे दृष्टीने आपल्या प्रभावी प्रचाराचा निश्चितच फायदा होईल, असा मला विश्वास आहे. आपल्या कार्यासाठी आपल्याला हार्दिक शुभेच्छा…!!” असे पत्रात लिहिले आहे.

धनंजय मुंडे यांनी भारतीय जनता पक्षातून राजकीय कारकीर्द सुरु केली होती. १९९५ च्या विधानसभा निवडणुकीपासून ते राजकारणात आले.

सुरुवातीला ते भारतीय जनता पक्षाच्या विद्यार्थी आघाडी प्रमुख होते. त्यानंतर भारतीय जनता युवा मोर्चाचे उपाध्यक्ष, प्रदेश सरचिटणीस व प्रदेशाध्यक्ष या पदांवर अनेक वर्ष त्यांनी काम केले. मात्र नंतर त्यांनी राष्ट्रवादी काँग्रेसमध्ये प्रवेश केला.

२०१४ मध्ये धनंजय मुंडे यांची विधानपरिषदेवर नियुक्ती झाली. पाच वर्ष त्यांनी विधानपरिषदेचे विरोधीपक्ष नेते म्हणून जबाबदारी सांभाळली. २०१९ मध्ये भाजपच्या तत्कालीन आमदार

आणि चुलत बहीण पंकजा मुंडे यांचा परळी मतदारसंघात पराभव करुन धनंजय मुंडे विधानसभेवर निवडून आले. उद्धव ठाकरेंच्या नेतृत्वातील महाविकास आघाडी सरकारमध्ये त्यांना

कृषी मंत्रालयाचे कॅबिनेट मिळाले. गेल्या वर्षी अजित पवार सत्तेत सहभागी झाले, त्यावेळी त्यांनीही महायुती सरकारमध्ये सामील होण्याचा निर्णय घेतला. मुंडेंना पुन्हा कृषी मंत्रिपद मिळाले.