शनिवारी नरेंद्र मोदींची नांदेडमध्ये जाहीर सभा

खासदार वसंत चव्हाण यांच्या अकाली निधनाने नांदेडची जागा रिक्त झाली आहे. येत्या २० नोव्हेंबर रोजी जिल्ह्यातील नऊ विधानसभेसोबतच लोकसभा पोटनिवडणूकीसाठी मतदान होणार आहे.

दुसरीकडे प्रचाराच्या रणधुमाळीला सुरुवात झाली असून येत्या ९ नोव्हेंबर रोजी नांदेडमध्ये पंतप्रधान नरेंद्र मोदी यांची जाहीर सभा होणार आहे.

खासदार वसंत चव्हाण यांच्या अकाली निधनाने निर्माण झालेल्या सहानुभूतीच्या लाटेत पंतप्रधान नरेंद्र मोदी यांची जादू चालणार की काँग्रेस आपली जागा राखणार याकडे सर्वांचं लक्ष लागलं आहे.

शनिवार, ९ नोव्हेंबर रोजी शहरातील  पंतप्रधान नरेंद्र मोदी यांची सभा पार पडणार आहे. लोकसभा पोटनिवडणूक आणि विधानसभेतील महायुतीच्या सर्व उमेदवारांच्या प्रचारार्थ नरेंद्र मोदी यांची जाहीर सभा आयोजित करण्यात आली आहे.

एप्रिल आणि मे महिण्यात पार पडलेल्या लोकसभा निवडणुकीत नरेंद्र मोदी यांनी भाजप उमेदवाराच्या प्रचारार्थ सभा घेतली होती. शिवाय केंद्रीय गृहमंत्री अमित शाह,

नितीन गडकरी यांच्या सह भाजपच्या अनेक दिग्गज नेत्याच्या सभा पार पडल्या. दुसरी काँग्रेसच्या राज्यातील नेत्यांशिवाय केंद्रातील एका ही नेत्यांची सभा झाली नाही.

तरी देखील नांदेडमध्ये काँग्रेसचा विजय झाला. काँग्रेसचे वसंत चव्हाण यांनी माजी खासदार प्रताप पाटील चिखलीकर यांचा ६० हजार इतक्या मताधिक्याने पराभव केला.

अशोक चव्हाण हे ऐन निवडणुकीच्या काळात भाजपात जाणे आणि मराठा आरक्षण या दोन्ही गोष्टीचा फटका भाजपला बसला होता. दरम्यान, वसंत चव्हाण यांच्या निधनाने रिक्त झालेल्या नांदेडच्या

जागेसाठी लोकसभेची पोटनिवडणूक होत आहे. शिवाय विधानसभेच्या निवडणुका देखील पार पडणार आहे. दोन्ही निवडणुका जिंकण्यासाठी भाजपाने कंबर कसली आहे.

लोकसभा पोटनिवडणुकीसाठी काँग्रेसकडून खासदार वसंत चव्हाण यांचे सुपुत्र प्रा. रविंद्र चव्हाण आणि भाजपकडून जिल्हाध्यक्ष डॉ संतुकराव हंबर्डे मैदानात आहेत.

या दोन्ही उमेदवारांची ही पहिली निवडणूक आहे. तेव्हा लोकसभा पोटनिवडणूक आणि विधानसभा निवडणुकीसाठी पंतप्रधान नरेंद्र मोदी यांची येत्या शनिवारी जाहीर सभा होणार आहे.

याशिवाय केंद्रीय गृहमंत्री अमित शाह, नितीन गडकरी, देवेंद्र फडणवीस यांच्यासह भाजपचे अनेक दिग्गज नेत्यांची नांदेडमध्ये सभा होणार आहे.

तर काँग्रेकडून मल्लिकार्जुन खर्गे, राहुल गांधी, प्रियंका गांधी यांची सभा होणार असल्याची माहिती आहे. दरम्यान, नांदेडमध्ये आतापर्यंत जेवढ्या पोटनिवडणुका झाल्या,

त्यात सहानुभूतीची लाट पहायला मिळाली. स्व.वसंत चव्हाण यांच्या निधनाने देखील जिल्ह्यात सहानुभूती लाट आहे. अशा परिस्थितीत पंतप्रधान नरेंद्र मोदी यांची जादू चालणार की काँग्रेसला सहानुभूतीच्या लाटेचा फायदा होणार याकडे राज्याचं लक्ष लागलं आहे.