दहा लाखांची लाच प्रकरणात फॉरेस्ट ऑफिसरला अटक ;घराची झाडाझडती रोकड,सोने जप्त

लाखो रुपयांच्या लाचेची मागणी केल्याप्रकरणी मांडवी वनक्षेत्रपाल संदीप चौरे यांच्यावर मंगळवारी मांडवी पोलिस ठाण्यात गुन्हा दाखल करण्यात आला.

त्यानंतर त्यांच्या मिरा रोड येथील घराची झाडाझडती घेतली असता घरात १ कोटी ३७ लाखांची रोकड आणि ५८ तोळे सोने आढळून आले आहे. तसेच त्यांच्या घरात महागडे फर्निचर आणि वस्तू आढळून आल्या आहेत.

तक्रारदार यांच्या मालकीची जमीन वसईतील सासूपाडा येथे असून ती संजय गांधी राष्ट्रीय उद्यानाच्या वनविभागाच्या क्षेत्रात येत असल्याने जागा ताब्यात घेऊन वनविभागाने सील केली होती. हे प्रकरण मांडवी परिक्षेत्राकडे प्रलंबित होते.

या प्रकरणात तक्रारदाराच्या बाजूने वस्तुस्थितीदर्शक अहवाल सादर करून ती परत मिळवून देण्याचे आश्वासन मांडवी परिक्षेत्राचे वनक्षेत्रपाल संदीप चौरे याने दिले होते.

त्यासाठी २० लाखांची लाच मागितली होती. याबाबत तक्रारदाराने पालघर लाचलुचपत प्रतिबंधक विभागाकडे तक्रार दाखल केली होती.

या लाचेच्या रकमेचा १० लाखांचा हप्ता घेण्यासाठी स्वीकारण्यासाठी चौरे आणि त्याचा साथीदार असलेला खासगी इसम चंद्रकांत पाटील हे दोघे येणार असल्याने लाचलुचपत विभागाने सापळा लावला होता.

मात्र याबाबत माहिती मिळाल्याने चौरे पैसे न स्वीकारता निघून गेला. तर या प्रकरणी मांडवी पोलिस ठाण्यात मंगळवारी गुन्हा दाखल करण्यात आला होता.

गुन्हा दाखल झाल्यानंतर रात्री ठाणे लाचलुचपत प्रतिबंधक विभागाने त्याच्या मिरा रोडच्या पूनमनगरमधील राहत्या घरात झाडाझडती घेतली. या ठिकाणी चौरे याच्या दोन सदनिका आहेत.

या सदनिका महागड्या फर्निचरने सजवल्याचे निष्पन्न झाले. तसेच लाचलुचपत प्रतिबंधक विभागाला घरात १ कोटी ३१ लाख लाखांची रोकड आणि तब्बल ५८ तोळे सोने आढळून आले आहे.

यासह बीड जिल्ह्यातील मोरगाव येथे ५८४ चौरस फुटांचे आरसीसी बांधकाम आणि नवी मुंबई येथील चामुंडा हिल्स कोस्ट येथे सदनिका अशा दोन स्थावर मालमत्ता निष्पन्न झाल्या आहेत.

तर इतर मालमत्तांचा शोध सुरू आहे. तर चंद्रकांत पाटील याची चारचाकी सापळा रचलेल्या घटनास्थळावरून जप्त करण्यात आली आहे.