नवंवर्षाच्या पहिल्या दिवशी अमेरिकेत दहशतवादी हल्ला, १२ लोकांचा मृत्यू

अमेरिकेच्या न्यू ऑर्लियन्स शहरात भयंकर हल्ला झाला असून, यामध्ये किमान १२ जणांचा मृत्यू आणि ३० लोक जखमी झाले आहेत.

हल्लेखोराने न्यू ऑर्लिन्समधील बोर्बन स्ट्रीटवर गर्दीत ट्रक घुसवला व नंतर वाहनातून बाहेर पडून गोळीबार करू लागला. याबाबत न्यू ऑर्लियन्स शहर पोलिसांनी माहिती दिली आहे.

या घटनेबाबत अधिक माहिती अशी की, अमेरिकेतील न्यू ऑर्लियन्स शहरातील बोर्बन स्ट्रीटवरील गर्दीत हल्लेखोराने ट्रक घुसवला.

यामध्ये वाहनाखाली चिरडले गेलेल्या १२ जणांचा मृत्यू झाला. त्यानंतर हल्लेखोराने वाहनातून बाहेर पडत गोळीबार करायला सुरूवात केली.

या घटनेमध्ये जखमी झालेल्यांना जवळच्या रुग्णालयात दाखल करण्यात आले आहे. यासह या हल्ल्यात दोन पोलीस अधिकारीही जखमी झाले आहेत.

या घटनेवर प्रतिक्रिया देताना न्यू ऑर्लीन्सचे महापौर लाटोया कँट्रेल यांनी हा “दहशतवादी हल्ला” असल्याचे म्हटले आहे.

पण, बुधवारी पहाटे ट्रक गर्दीत घुसला तेव्हा नेमकं काय घडले याचा तपास एफबीआयने सुरू केला आहे.

बीबीसीच्या वृत्तानुसार, सोशल मीडियावर व्हायरल होत असलेल्या अनेक व्हिडिओमध्ये जमिनीवर अनेक लोक गंभीर जखमी झाल्याचे दिसत आहे.

ही घटना घडल्यानंतर न्यू ऑर्लीन्स शहर आपत्कालीन विभागाने एक्सवर पोस्ट करत, “कॅनल आणि बोर्बन स्ट्रीटवर मोठा अपघात घडला आहे. या परिसरापासून दूर राहा”, असे म्हटले आहे.

दरम्यान न्यू ऑर्लीन्स हल्ल्यातील हल्लेखोराचा मृत्यू झाल्याचे एका पोलीस अधिकाऱ्याने सीएनएनला सांगितले.

जाणूनबुजून हे कृत्य केल्याचे काही पुरवे सापडल्याचेही पोलिसांनी स्पष्ट केले आहे. एफबीआय

आणि पोलीस संयुक्तपणे या हल्लामागे काय हेतू आहे याचा शोध घेण्यासाठी वाहनाची तपासणी करत आहेत.

प्रत्यक्षदर्शींच्या म्हणण्यानुसार, पांढऱ्या रंगाचा ट्रकने बॅरिकेड्स तोडून फुटपाथवरील लोकांना चिरडले.

या घटनेवेळी तिथे उपस्थित असलेला २२ वर्षांचा केविन गार्सिया म्हणाला की, “बोर्बन फुटपाथच्या डाव्या बाजूला एक ट्रक प्रत्येकाला चिरडत असल्याचे मी पाहिले.

यावेळी एक मृतदेह माझ्याकडे दिशेने उडल्याचेही मी पाहिले. यानंतर लगेचच मला आला गोळाबाराचाही आवज ऐकू आला.” याबाबत सीएनएनने वृत्त दिले आहे.