पोलीस भरतीत २५ वर्षीय तरुणाचा मृत्यू

बाळेगाव शिळफाटा येथील राज्य राखीव पोलिस दल (एसआरपीएफ) गट क्रमांक ११, नवी मुंबई कॅम्पसाठी सुरू असलेल्या पोलिस भरतीदरम्यान शनिवारी झालेल्या मैदानी चाचणीत

अत्यवस्थ झालेल्या ७ उमेदवारांपैकी एका तरुणाचा रुग्णालयात मृत्यू झाला आहे. तर आणखी एका तरुणाची प्रकृती चिंताजनक आहे.

अन्य अत्यवस्थ उमेदवारांवर कळवा येथील छत्रपती शिवाजी महाराज रुग्णालयात अतिदक्षता विभागात उपचार सुरू आहेत.

पोलिस भरतीदरम्यान मृत झालेल्या तरुणाचे नाव अक्षय मिलौंद विऱ्हाडे (२५) असे असून तो जळगाव येथील अंमळनेर येथे राहत होता.

अक्षयने राज्य राखीव पोलिस बल गट क्र. ११, नवी मुंबई कॅम्पच्या सशस्र पोलिस शिपाई भरतीसाठी अर्ज केला होता. शनिवारी बाळेगाव, वाकळण येथील एसआरपीएफच्या कॅम्पमध्ये मैदानी चाचणी सुरू होती.

पुरुष उमेदवारांमध्ये ५ किमी धावण्याची चाचणी सुरू असताना ७ उमेदवारांना चक्कर येऊन ते कोसळले. त्यामुळे त्यांना तत्काळ कळवा येथील छत्रपती शिवाजी महाराज रुग्णालयामध्ये दाखल करण्यात आले.

मात्र या ठिकाणी पोहोचण्यापूर्वीच अक्षयचा मृत्यू झाला. यातील प्रेम सुखदेव ठाकरे (२९) हा दुसरा उमेदवार अत्यवस्थ असून त्याच्यावर तसेच अमित गायकवाड (२०),

पवन शिवाजी शिंदे (२५), अभिषेक शेटे (२४), सुमीत किशोर अदाटकर (२३) साहिल किशोर लावण (१९) या सर्वांवर छत्रपती शिवाजी रुग्णालयातील अतिदक्षता विभागात उपचार सुरूआहेत.

दरम्यान, अक्षयला हृदयविकाराचा झटका आला की त्याने काही सेवेन केले होते, याची तपासणी रुग्णालयाकडून करण्यात येत आहे. शवविच्छेदनानंतरच त्याच्या मृत्यूचे कारण स्पष्ट होणार असल्याची माहिती डॉक्टरांनी दिली