शरद पवारांच्या स्वागताला भाजप आमदार ;पवार म्हणाले….

राष्ट्रवादीचे अध्यक्ष, ज्येष्ठ नेते शरद पवार आज (रविवारी) धुळे दौऱ्यावर आहेत. शिरपूर विमानतळावर त्यांच्या स्वागताला महाविकास आघाडीच्या कार्यकर्त्यांनी गर्दी केली होती.

यावेळी शिरपूरचे भाजपचे आमदार अमरीशभाई पटेल यांनीही पवारांचे स्वागत केले. स्वागतावेळी शरद पवार आणि अमरीश पटेल या दोन नेत्यांमध्ये मिश्किल संवाद झाला. त्यामुळे उपस्थितांमध्ये एकच हशा पिकला.

शरद पवार हे सकाळी नऊ वाजता शिरपूर विमानतळावर आल्याने अनेकांची धावपळ उडाली. शिरपूर विमानतळावर शरद पवार यांचे स्वागत करण्यासाठी महाविकास आघाडीच्या कार्यकर्त्यांनी गर्दी केली होती.

पवारांचे स्वागत करण्यासाठी भाजप आमदार अमरीशभाई पटेल यांनीही उपस्थिती लावली. अमरीशभाईंच्या उपस्थितीने अनेकांचे डोळे विस्फारले होते.

शरद पवार यांनी हाच धागा पकडून तुम्ही माझ्या स्वागताला कसे काय? असे मिश्किलपणे विचारले. त्यावर ‘पक्ष बिक्ष काय असतो हो साहेब…’ असे उत्तर अमरीशभाई पटेल यांनी दिलं. या दोन नेत्यांमधल्या संवादाची चर्चा आता धुळे जिल्ह्यासह राज्यभर होत आहे.

खासदार शरद पवार यांचे धुळे जिल्ह्यातील शिरपूर विमानतळावर आगमन झाले. आज रविवारी सकाळी त्यांनी शिंदखेडा येथे शेतकरी मेळाव्याला संबोधित केले.

आगामी विधानसभा निवडणुकीच्या दृष्टीने त्यांच्या शेतकरी मेळाव्याला महत्त्व प्राप्त झाले आहे. शेतकरी मेळाव्यानंतर पवार भजनी मंडळांना साहित्यचे वाटपही करण्यात आलं.

”सत्तेचा माज काही लोकांच्या डोक्यात गेलाय, त्यांना त्यांची जागा दाखवून द्या. शिंदखेडा तालुक्यात सत्तेचा गैरवापर सुरू आहे. येथे एक प्रकारची गुंडगिरी सुरु आहे.

हेमंत देशमुख सारखा नेत्याला तुरुंगात टाकण्याचे काम सरकारने केले. खरे तर हा सत्तेचा गैरवापर आहे. सरकार लोकांच्या सेवेसाठी असते पण यांच्या डोक्यात सत्तेचा माज गेलाय.

यांच्याकडून सत्तेचा उन्माद दिसून येतो. या विधानसभा निवडणुकीत त्यांना त्यांची जागा दाखवून देण्याचे काम करा”, असे आवाहन पवार यांनी केले.

दरम्यान, शरद पवार यांचे शिंदखेडा येथे आगमन झाले. यावेळी त्यांचं भव्य स्वागत करण्यात आलं. शिंदखेडा येथील शेतकरी मेळाव्याला पुष्पवृष्टी करत शरद पवार यांचं स्वागत करण्यात आले.

जेसीबीवरून शरद पवारांच्या वाहनांच्या ताफ्यावर पुष्पवृष्टी करण्यात आली. शरद पवार वेळेवर कार्यक्रमाला हजर उपस्थित झाल्यामुळे आयोजकांची मात्र तारांबळ उडाली.

सकाळी कार्यकर्त्यांना जमावण्याचं गणित पवारांच्या लवकर आगमनामुळे चुकले. ऐनवेळी धावपळ करत कार्यकर्त्यांची जमवाजमव करण्यात आली.