बीड जिल्ह्यात शरद पवार नवीन खेळी करण्याच्या तयारीत

विधानसभा निवडणुकीचं बिगूल वाजलं आहे. राज्यात एकाच टप्प्यात २० नोव्हेंबर रोजी बुधवारी मतदार होणार असून, २३ नोव्हेंबर रोजी शनिवारी निकाल जाहीर होणार आहेत.

निवडणूक आयोगाच्या या तारखांच्या घोषणानंतर सर्वच पक्षांनी निवडणुकीची तयार करण्यास सुरुवात केली आहे. निवडणुकीच्या तारखांच्या घोषणेनंतर

राजकारणाचा बालेकिल्ला म्हणून समजल्या जाणाऱ्या बीड जिल्ह्यात राजकीय हालचालींना वेग आला आहे. शरद पवार गटाकडून बीड जिल्ह्यात उमेदवारी देण्याबाबत चाचपणी सुरू आहे.

बीड जिल्ह्यातील सहा विधानसभा मतदारसंघांपैकी चार विधानसभा मतदारसंघात २०१९ मध्ये राष्ट्रवादी काँग्रेसचे चार उमेदवार विजयी झाले होते.

मात्र राष्ट्रवादी काँग्रेसच्या फुटीनंतर तीन आमदारांनी पवारांशी बंडखोरी करत अजित पवार गटात प्रवेश केला. आता याच मतदारसंघात शरद पवारांकडून नवी खेळी खेळण्याची तयारी सुरू आहे.

बीड विधानसभा मतदारसंघात विद्यमान आमदार संदीप क्षीरसागर यांच्यावर नाराजीचा सूर दिसून येत असल्याने या मतदारसंघात देखील शरद पवार गटाकडून उमेदवाराची चाचपणी सुरू आहे.

अशातच मनोज जरांगे पाटील यांच्या जवळचे सहकारी म्हणून ओळखले जाणारे भानुदास जाधव यांनी शरद पवार यांची भेट घेऊन बीड विधानसभा मतदारसंघात निवडणूक लढवण्याची इच्छा व्यक्त करत मुलाखत दिली आहे.

भानुदास जाधव हे व्यवसायाने कर सल्लागार असून मागील अनेक वर्षांपासून ते मराठा आंदोलनाच्या चळवळीत सक्रीय कार्यरत आहेत.

अशातच मनोज जरांगे पाटील यांच्या समवेत देखील त्यांचा सक्रिय सहभाग दिसून आला. लोकसभा निवडणुकीतील अंदाज पाहता पवार बीड, आष्टी, माजलगाव

आणि परळी मतदारसंघात नेमकी कोणती खेळी खेळणार? याकडेच लक्ष आहे. मात्र अशातच विद्यमान आमदार संदीप क्षीरसागर यांना पर्याय म्हणून जाधव यांनी तयारी सुरू केली.

शरद पवार गटाने उमेदवारी न दिल्यास जरांगे पाटील यांच्या विचारातून ही निवडणूक लढवण्याची तयारी भानुदास जाधव यांनी केली आहे.