पुण्यात सहा वेगवेगळ्या विमानात बॉम्ब ठेवण्याची धमकी ; धक्कादायक ट्विट

देशातील प्रवासी विमानांना बाॅम्बच्या धमक्यांची मालिका सुरूच आहे. गेल्या शनिवार 19 ऑक्टोबरला 30 हून अधिक विमानांना बॉम्बची धमकी देण्यात आली होती.

त्यामुळे विमानांचे इमर्जन्सी लँडिंग करण्यात आले. त्यानंतर पूर्ण तपासणीनंतर विमाने रवाना करण्यात आली. त्यामुळे शेकडो प्रवाशांचे तासनतास हाल झाले. हा खळबळजनक प्रकारा ताजा असताना पुण्यातून अशीच एक बातमी समोर आली आहे.

पुण्यात सहा वेगवेगळ्या विमानात बॉम्ब ठेवणार असल्याचं धक्कादायक ट्विट समोर आले आहे. विस्तारा एअरलाईन्सच्या 6 वेगवेगळ्या विमानात बॉम्ब ठेवण्यात येणार असल्याचं ट्विट करण्यात आले आहे.

या ट्विटच्या माध्यमातून दहशत पसरवण्याचा प्रयत्न केल्याचे बोलले जात आहे. पुण्यातील विमान नगर पोलीस स्टेशनमध्ये ट्विट करणाऱ्याविरोधात

गुन्हा दाखल करण्यात आला असून पोलीस या प्रकरणाचा अधिक तपास करत आहेत. मात्र या ट्विटमुळे सर्वत्र एकच खळबळ उडाली आहे.

मिळालेल्या माहितीनुसार, स्किझोफेर्निया या ट्विटर अकाऊंटवरून अज्ञात इसमाने हे ट्विट केले होते. यात 6 वेगवेगळ्या विमानामध्ये 12 जण बॉम्ब ठेवणार असल्याची ट्विटमधून माहिती देण्यात आली होती.

दरम्यान, या प्रकरणी विमानतळ पोलिसांनी अज्ञात व्यक्ति विरोधात गुन्हा दाखल केला असून ट्विटद्वारे दहशत पसरवण्याच्या प्रयत्न करणाऱ्या आरोपीचा शोध सध्या सुरु करण्यात आला आहे.

यातील आरोपीने 6 विमानांचे नंबरही ट्विटमध्ये टाकले होते आणि बॉम्ब ठेवण्यात येणार असल्याचे ट्विट मध्ये उल्लेख केला आहे.

सिझोफेनिया 111 (schizophrenia111 @schizophreniqqq) असे ट्विटर अकाऊंट वापरकर्त्यावर गुन्हा दाखल करण्यात आला आहे.

हा प्रकार सिंगापूर ते पुणे विमान प्रवासादरम्यान ट्विटरद्वारे रविवारी दुपारी दीड वाजता घडला. मेसेजमध्ये 12 जण विमानात असून त्यापैकी 6 जण तुमच्या विमानात बॉम्बसह आहेत.

फ्लाईट यु के 24, फ्लाईट यु के 106, फ्लाईट युके 146, फ्लाईट युके 116, फ्लाईट युके 110, फ्लाईट युके 107 (प्रत्येकी 2 जण) सर्व जण संपणार आहेत.

असा मेसेज मिळाला आहे. तर एअरपोर्ट परिसरातील नागरिक आणि प्रवाशांमध्ये खोटी माहिती आणि अफवा पसरवून भितीदायक वातावरण निर्माण केल्याचे तक्रारीत म्हटले आहे

एकंदरीत देशातील प्रवासी विमानांना बाॅम्बच्या धमक्यांची मालिका लक्षता घेता केंद्रीय गृह मंत्रालयाने नागरी विमान वाहतूक मंत्रालय आणि नागरी उड्डाण सुरक्षा ब्युरोकडून या संदर्भात सविस्तर अहवाल मागवला आहे.

सीआयएसएफ, एनआयए आणि आयबीलाही अहवाल सादर करण्यास सांगितले आहे. त्याचवेळी, केंद्रीय कार्मिक मंत्रालयाने डीजीसीए प्रमुख विक्रम देव दत्त यांना पदावरून हटवून कोळसा मंत्रालयात सचिव केले.

हा बदल धोक्याच्या बाबींशी जोडला जात आहे. त्याच वेळी, एकाच वेळी 30 धमक्या मिळाल्यानंतर, विमान कंपन्यांच्या वरिष्ठ अधिकाऱ्यांनी नागरी उड्डाण सुरक्षा ब्युरो च्या

अधिकाऱ्यांची भेट घेतली. ब्युरोचे महासंचालक झुल्फिकार हसन यांनी त्यांना आश्वासन दिले की भारतीय आकाश पूर्णपणे सुरक्षित आहे.