ईडीच्या चौकशीवर पहिल्यांदाच जाहीर सभेत बोलले राज ठाकरे

विधानसभा निवडणुकीनंतर मनसेचा आज मुंबईत पहिलाच कार्यकर्ता मेळावा आयोजित करण्यात आला. या मेळाव्यात मनसे अध्यक्ष राज ठाकरे यांनी जोरदार भाषण केलं.

राज ठाकरे यांनी विविध मुद्द्यांवर आजच्या भाषणात परखड मत मांडलं. राज ठाकरे यांनी भाजप, शिवसेनेवरही टीका केली. तसेच आपण भूमिका बदलतो म्हणून टीका केली जाते.

ईडी चौकशीला घाबरलो म्हणून पंतप्रधान नरेंद्र मोदी यांची स्तुती केली, अशी टीका काही जणांकडून केली जाते, असं राज ठाकरे यावेळी म्हणाले. यावेळी राज ठाकरे यांनी ईडीची आपल्या विरोधात नेमकी काय कारवाी झाली होती? याबाबत सविस्तर A टू Z माहिती दिलं.

“माझ्या मागे ईडी लावली म्हणून मी भूमिका बदलली, अशी टीका काही लोकं करतात. राज ठाकरेंनी पहिल्यांदा नरेंद्र मोदींना पाठिंबा दिला. मग त्यांच्या विरोधात बोलायला लागले. मग परत त्यांनी पाठिंबा दिला.

कारण त्यांच्यामागे ईडी लावली, अशी टीका काहीजण करतात. मला तीपण कहाणी आज तुमच्यासमोर सांगायची आहे. इथे समोर महाराजांचा पुतळा आहे. त्यांच्यासमोर मी जे सांगीन ते शपथपूर्व सांगेन”, असं म्हणत राज ठाकरेंनी ईडी चौकशीबाबत सविस्तर माहिती सांगायला सुरुवात केली.

“2005 सालाची गोष्ट असेल. मी ज्या शिवाजी पार्क मैदानात लहानाचा मोठा झालो तिथे आम्ही लहानपणापासून कोहीनूर मिल पाहत होतो. येता-जाता ती मिल डोळ्यांसमोर यायची.

एकेदिवशी मी वर्तमानपत्रात एक बातमी वाचली. तोपर्यंत आम्ही आमचा व्यवसाय सुरु केलेला होता. आता व्यवसाय करणं हे तर पाप असू शकत नाही ना? अनेकांना तर व्यवसाय दाखवताही येत नाहीत. तरी त्यांच्या सगळ्या गोष्टी सुरु असतात”, असा टोला राज ठाकरे यांनी लागवला.

“वर्तमानपत्र वाचत असताना मला एक बातमी दिसली की, एनटीएससीच्या म्हणजेच केंद्र सरकारच्या सर्व मिल्सबाबत सुप्रीम कोर्टाने निर्णय दिला आहे की, त्या मिल्स काढा आणि कामगारांचे जे पगार अडकले आहेत ते देवून टाका.

मी आपली बातमी वाचत होतो. बातमी वाचत असताना तिथे यादीत कोहीनूर मिलचं नाव होतं. मी माझ्या पार्टनरला फोन केला आणि सांगितलं की, कोहीनूर मिलचं असं काही समोर येतंय.

त्यावर त्याने सांगितलं की, अरे हे प्रकरण फार मोठं आहे. मी म्हटलं, मला मान्य आहे. काय आहे ते एकदा चेक करु. मी माझ्या एका दुसऱ्या सहकाऱ्याला फोन केला.

त्यांना बोलवून घेतलं आणि म्हटलं की, बसवून बघा, काय होतंय. त्यांनी आकडेवारी जोडली आणि टेंडर भरुन घेण्याचा निर्णय झाला”, असं राज ठाकरे यांनी सांगितलं.

“एकेदिवशी माझ्या सहकाऱ्यांचा घाबरत घाबरत फोन आला. टेंगर लागलं म्हणून सांगितलं. मी म्हटलं की, घाबरतो कशाला? तर म्हणजे, 400 ते 500 कोटींचं टेंडर होतं.

पैसे आणायचे कुठून? माझीसुद्धा पायाखालची जमीन सरकली होती. पण ती दाखवायची कशी? मग आमच्या एका दुसऱ्या मित्राला सांगितलं. त्याने आयएलएनएफ नावाची कंपनी होती, त्या कंपनीशी ते बोलले.

त्या कंपनीने सांगितलं की, तुमच्याबरोबर यायला तयार आहोत आम्ही पैसे भरायला तयार आहोत. त्यामुळे सगळे पैसे कंपनीने भरले. आम्ही त्यामध्ये पार्टनर होतो. आम्ही सात-आठ जण होतो”, असं राज ठाकरे म्हणाले.

“सगळं सुरु झालं आणि परत त्याला ब्रेक आला. परत ती केस कोर्टात गेली आणि सर्व मिल अडकल्या. त्यामध्ये वर्ष दीड-दीड वर्ष गेलं. मग त्यानंतर सर्व दीड वर्षांनी सुरु झालं.

त्या दरम्यान मी माझ्या सहाऱ्यांना म्हटलं की, हा पांढरा हत्ती आहे. आपल्याला झेपायचं नाही. मग माझ्याबरोबरचे अनेक पार्टनर म्हणाले की, आपल्याला हे झेपणार नाही

आणि आम्ही आमचे पैसे घेऊन त्यातून बाहेर पडलो. ही गोष्ट 2008 ची आहे. त्यानंतर आमचा विषय संपला”, असं राज ठाकरे यांनी सांगितलं.

“ज्या दिवशी मला ईडीची नोटीस आली तेव्हा प्रश्न पडला की, कसली ईडीची नोटीस? आम्ही नोटीसचा विषय पाहिला तेव्हा त्यामध्ये कोहिनूरचा विषय होता.

मी म्हटलं आपला याच्याशी काय संबंध? मला तिकडे बोलावलं. ते माणसं माझ्याशी काय बोलत होते ते मला समजत नव्हतं. म्हटलं काय झालं?

जे पैसे आले त्यावर आम्ही टॅक्स भरले आणि तो गेला. कंपनीत टॅक्स भरला, त्या कंपनीने तिकडे टॅक्स भरला. त्या कंपनीने तिकडे टॅक्स भरला”, असं राज ठाकरे म्हणाले.

“मी माझ्या सीएला बोलावलं तेव्हा त्याला विचारलं की, काय भानगड आहे. तेव्हा त्याने सांगितलं की, तुमच्यातला एक पार्टनर आहे त्याने इनकम टॅक्स भरला नाही.

त्याने परस्पर ते पैसे वापरुन घेतले. मी म्हटलं मग आता काय करायचं? म्हणे, परत टॅक्स भरायचे. आम्ही परत सर्वांनी टॅक्स भरुन टाकले. विषय संपला.

एवढ्या गोष्टीसाठी राज ठाकरे ईडीला घाबरला आणि मोदींचं कौतुक करु लागला? मला त्याच्याशी काय देणंघेणं? मी माझ्या डोक्यावर तलवारी घेऊन फिरत नाहीत”, अशी भूमिका राज ठाकरे यांनी यावेळी मांडली.