….. आणि खासदारांचा सुरु प्रचार अचानक थांबला ;काय होता भाजप नेत्याच्या मेसेज?
..... and the campaigning of the MPs suddenly stopped; what was the BJP leader's message?
राष्ट्रवादी काँग्रेस प्रणित अपक्ष निवडून आलेल्या व सध्या भारतीय जनता पक्षाच्या समर्थक असलेल्या खासदार नवनीत राणा यांनी अधिकृतरित्या उमेदवारी जाहीर होण्याअगोदरच
अमरावती लोकसभा मतदारसंघातील मेळघाटसह इतर भागात फिरत असलेला विजय २०२४ निर्धार प्रचार रथ व इतर प्रचार अचानक थांबवल्याने
जिल्ह्यात विविध चर्चांना उधाण आले आहे. यासाठी नवनीत राणा यांना भारतीय जनता पार्टीच्या बड्या नेत्याने मेसेज दिल्याची जोरदार चर्चा आहे.
अमरावतीच्या खासदार नवनीत राणा व आमदार रवी राणा सातत्याने या ना त्याकारणाने चर्चेत असतात. दोन दिवसांपूर्वी त्यांनी प्रचार रथातून मेळघाटात प्रचार सुरू केल्याची माहिती माध्यमांना दिली होती.
या प्रचार रथामध्ये लावण्यात आलेल्या बॅनरवर विजय २०२४ निर्धार रथ असे लिहिलेले होते. यावर पंतप्रधान नरेंद्र मोदी, गृहमंत्री अमित शहा, भाजपाध्यक्ष जेपी नड्डा, मुख्यमंत्री एकनाथ शिंदे,
उपमुख्यमंत्री अजित पवार, उपमुख्यमंत्री देवेंद्र फडणवीस, पुन्हा मला साथ द्या आणि आशीर्वाद द्या, असे आवाहन करताना ‘प्रत्येकाला आत्मविश्वास-विजय हमखास’ अशी टॅगलाईन या बॅनरवर होती.
मध्य प्रदेशला लागून असलेले मेळघाटातील गावे व चिखलदरा तालुक्यातील महत्त्वाच्या व मोठ्या गावात प्रचारात आघाडी घेण्यासाठी खासदार नवनीत राणा यांनी प्रचार रथ फिरवण्यास सुरुवात केली होती.
महाराष्ट्रातील २० उमेदवारांची यादी भाजपने जाहीर केलेली असली तरी संभाव्य असेलल्या उमेदवार नवनीत राणा यांची उमेदवारी भाजपकडून जाहीर करण्यात आलेली नाही.
त्याअगोदरच नवनीत राणा यांनी भाजपच्या बड्या नेत्यांचा फोटो वापरून प्रचारात आघाडी घ्यायला सुरूवात केली होती. मात्र अचानक हे सर्व प्रचार रथ थांबवण्यात आल्याची माहिती मेळघाटातून समोर आली आहे.
यामागे भाजपच्या बड्या नेत्याचा मेसेज असल्याची जोरदार चर्चा सध्या जिल्ह्यात आहे. आपण प्रचार तूर्तास थांबवावा, अशा सूचना भाजपच्या वरिष्ठ नेत्यांनी राणा यांना दिल्याची कुजबूज आहे.
यासंदर्भात सविस्तर माहिती जाणून घेण्यासाठी आमदार रवी राणा यांना फोन केला असता केला असता, ते कामात असून लवकरच आपल्याशी बोलतील अशी माहिती त्यांच्या स्वीय सहायकाने दिली.
अधिकृत उमेदवारी जाहीर होण्यापूर्वी एनडीएच्या नेत्यांचे फलक असलेले विजय २०२४ निर्धार रथाच्या माध्यमातून जोमात सुरू असलेला प्रचार अचानक थांबल्याने राजकीय विश्लेषक या घटनेकडे विविध दृष्टीने बघत आहे.
