राज्यात जलसंकट;पावसाने दडी मारल्याने बळीराजा चिंतातुर

• 

 

 

 

 

 

अवघा जून कोरडा गेल्यानंतर जुलैमध्ये देशभरात सरासरीपेक्षा अधिक पाऊस पडू शकेल आणि दीर्घकालीन सरासरीपेक्षा १०६ टक्क्यांहून हा पाऊस अधिक असू शकेल,

 

 

 

 

असा दिलासादायक अंदाज हवामाना विभागाने १ जुलैला वर्तवला होता. मात्र, जुलै महिन्याचा पहिला आठवडा संपत आला तरी अनेक ठिकाणी पावसाने दडी मारली आहे.

 

 

 

त्यामुळे एकीकडे पिण्याच्या पाण्यासाठी दशदिशा फिरण्याची वेळ आलेली असतानाच, पेरण्या खोळंबल्याने शेतकऱ्यांची चिंता वाढली आहे.

 

 

 

राज्यात अनेक ठिकाणी पावसाचे आगमन झाले असले तरी धरणांमधील पाणीसाठा मात्र गेल्या वर्षीच्या तुलनेत कमीच नोंदविण्यात आला आहे.

 

 

 

राज्यात जवळपास ९८५ टँकरच्या माध्यमातून पाणीपुरवठा सुरू असल्याचे माहिती जलसंपदा मंत्रालयाच्या अहवालातून समोर आली आहे.

 

 

 

राज्यातील एकूण ७९५ गावे आणि ३ हजार १५७ वाड्यांमध्ये टँकरच्या माध्यमातून पाणीपुरवठा सुरू असल्याचे या आकडेवारीतून समोर आले आहे.

 

 

 

 

 

ठाणे, कल्याण-डोंबिवली, अंबरनाथ, पनवेल भागांत नागरिकांनी पाणीटंचाईचा धसका घेतला असून कमी दाबाने पाणीपुरवठा, तसेच ग्रामीण भागांत एक दिवसाआड पाणीपुरवठा ही परिस्थिती उद्भवली आहे.

 

 

 

उत्तर महाराष्ट्रातील धरणांमधील पाणीसाठाही अवघा आठ टक्क्यांवर आला आहे. पश्चिम महाराष्ट्रातील धरणांमध्ये केवळ १८ टक्केच पाणी शिल्लक आहे. तर, मराठवाड्यात खरीप पिकांना खंडित पावसाचा फटका बसला आहे.

 

 

 

मुंबई
सात धरणांच्या क्षेत्रात अद्यापही समाधानकारक पाऊस नाही
सात धरणांत नऊ टक्के पाणीसाठा: परिस्थिती चिंताजनक
राखीव जलसाठ्याचा वापर सध्या बंद करण्याचा निर्णय

 

 

 

 

ठाणे जिल्हा
डोंबिवलीच्या ग्रामीण भागांत एक दिवसाआड पाणीपुरवठा
कल्याणमध्ये अनेक भागांत कमी दाबाने पाणीपुरवठा
अंबरनाथ, बदलापूर शहरांत नागरिकांना टँकरचाच आधार

 

 

 

विदर्भ
खरीप पेरणीत तूट: तूर्त सरासरी ४५.९६ टक्के क्षेत्रावरच पेरणी
अनेक भागांत धूळपेरणी उलटल्याने दुबार पेरणीचे संकट कायम
आठ जिल्हे कोरडे; टँकरने पाणी देऊन पीक जगवण्याचा प्रयत्न
मोरबे धरणग्रस्तांचा उद्रेक, धरणाचं प्रवेशद्वार तोडून पाणी बंद करण्याचा प्रयत्न

 

 

 

मराठवाडा
खरीप पिकांना खंडित पावसाचा फटका: जेमतेम २७ टक्के पाऊस
एकूण क्षेत्रापैकी १५ ते २० टक्के क्षेत्रावर पेरणी होणे शक्य नाही
संभाजीनगर विभागात पिकांना विहिरीचे पाणी

 

 

 

पश्चिम महाराष्ट्र
पुण्याला ऑगस्ट अखेर पुरेल इतकेच पाणी सध्या उपलब्ध
सातारा, सांगली, कोल्हापूर, सोलापूर पाणीसाठा खालावला
कोल्हापूर विभागात चालू महिन्यात आत्तापर्यंत १४ टक्के पाऊस

 

 

 

 

उत्तर महाराष्ट्र
अवघा जिल्हा कोरडाटाक असल्याने पाणीटंचाईची भीती तीव्र
जळगाव व धुळ्यामधील काही तालुके अजूनही टंचाईग्रस्त
जुलै महिना सुरू झाल्यानंतरही अनेक ठिकाणी टँकरने पाणीपुरवठा